Tenantiaethau

Polisi’r Ymddiriedolwyr o ran gosod tai ar Ystad Brondanw

Trefniadau cyswllt rhwng yr ymddiriedolwyr, yr asiantau rheoli a’r tenantiaid

1. Cefndir
Yn ôl y Ddeddf Elusennau, rhaid i’r Ymddiriedolaeth ddefnyddio’r arian sydd ar gael iddi yn y ffordd orau bosibl. Mae Cyfansoddiad yr Ymddiriedolaeth yn nodi amcanion elusennol yr ymddiriedolaeth, sy’n cynnwys y canlynol:-

Hyrwyddo’r arfer o ddiogelu tiroedd hardd neu diroedd o ddiddordeb hanesyddol, ecolegol neu wyddonol, ynghyd â gwarchod, diogelu a chyfoethogi agwedd naturiol, cymeriad, amgylchedd, bioamrywiaeth ac amwynderau’r Ardal;

Hyrwyddo mynediad cyhoeddus cyfrifol i gefn gwlad, darparu llwybrau a ffyrdd i’r diben hwnnw a diogelu llwybrau troed, tiroedd comin a thiroedd gwastraff;

Hyrwyddo’r arfer o ddiogelu ac ailsefydlu gerddi a thirweddau dyluniedig o ddiddordeb cenedlaethol, hanesyddol neu artistig, ynghyd â mynediad cyhoeddus i erddi a thirweddau o’r fath a mwynhad ohonynt;

Hyrwyddo’r arfer o ddiogelu ac adfer adeiladau o ddiddordeb cenedlaethol, hanesyddol, pensaernïol neu artistig, ynghyd â mynediad cyhoeddus i adeiladau o’r fath a mwynhad ohonynt, a chynyddu amwynderau adeiladau o’r fath a’u hamgylchoedd adeiledig a naturiol;

Hyrwyddo cadwraeth y dirwedd wledig (yn cynnwys diogelu ac adfer adeileddau a safleoedd sy’n rhan o’r dirwedd honno ac sydd o ddiddordeb hanesyddol, pensaernïol neu artistig, neu o werth amwynderol), cadwraeth planhigion ac anifeiliaid, dulliau cynaliadwy mewn perthynas ag amaethyddiaeth, coedwigaeth a mentrau eraill sy’n ategu cadwraeth o’r fath, ac ymchwilio i’r elfennau hyn a chyhoeddi canlyniadau defnyddiol;

Hyrwyddo astudiaeth ac addysg, yn arbennig mewn meysydd sy’n berthnasol i’r Ardal, fel hanes lleol, diwylliant Cymru, ecoleg, gwyddor ddaearegol, gwyddor fiolegol a gwyddorau perthynol, ac ymchwilio i’r elfennau hyn a chyhoeddi canlyniadau defnyddiol.

2. Cyflwyniad
Mae’r Ymddiriedolwyr yn berchen ar oddeutu 50 o unedau preswyl a leolir yn, ac o amgylch, Llanfrothen a Chwm Croesor. Nid yw hyn yn cynnwys Portmeirion.

Nod yr Ymddiriedolaeth yw datblygu ei hamcanion cadwraethol yn yr ardal trwy gyfrwng ei pholisïau gosod tai, sy’n anelu at wneud y canlynol::

• Diogelu’r adeiladau trwy gael pobl i fyw ynddynt a’u cadw mewn cyflwr da;
• Dod o hyd i denantiaid sy’n awyddus i gyfrannu at y gymuned ac sy’n meddu ar sgiliau a fydd yn eu galluogi i ategu nodau’r Elusen yn yr ardal;
• Dal gafael ar bobl (yn cynnwys pobl ifanc) yn yr ardal;
• Cynnal y patrwm ieithyddol.

3. Polisi’r Ymddiriedolwyr ar Osod Bythynnod

Yn Ystad Brondanw, pan fo cymunedau sydd â chysylltiadau hanesyddol gyda’r Ystad wedi ennill eu plwyf, caiff polisïau arbennig eu rhoi ar waith pa bryd bynnag y bo modd er mwyn sicrhau y gall pobl leol barhau i fyw yno.

Yn gyffredinol, mae yna alw mawr am dai Ystad Brondanw, ac er mwyn cadw cofnod o’r bobl sydd â diddordeb caiff rhestr aros ei chadw.

Fel rheol wrth osod tai, bydd yr Asiantau Rheoli yn edrych ar y rhestr aros a/neu yn hysbysebu’r eiddo’n lleol mewn papurau newydd ac ar fyrddau ‘I’w Osod’. Yr Asiantau Rheoli, mewn ymgynghoriad â’r Ymddiriedolwyr Lleol, fydd yn mynd ati i ddewis y tenantiaid. Ystyrir y ffactorau canlynol cyn cymhwyso’r dull dilyniannol a nodir ar y diwedd:-

1. Unrhyw gysylltiad â’r Ystad, e.e. merch neu fab tenant presennol, neu unigolyn lleol sy’n symud yn ôl i’r ardal ar ôl bod yn y coleg neu’n gweithio i ffwrdd.
2. Yr angen i adleoli tenantiaid presennol yr Ystad sy’n dymuno symud i dŷ mwy neu i dŷ llai am resymau ymarferol.
3. Cyfraniad yr ymgeisydd a’i deulu at gymunedau Llanfrothen a Chroesor, a’i gysylltiad â’r cymunedau hynny.
4. Y bobl hynny ar y rhestr aros a chanddynt deulu sy’n byw ar yr Ystad neu yn y dyffryn.
5. Y bobl hynny ar y rhestr aros a chanddynt gysylltiadau teuluol â’r Ystad neu’r dyffryn.
6. Polisi’r Ymddiriedolwyr o geisio annog pobl gyflogedig neu hunangyflogedig i ymgeisio.
7. Gallu’r unigolyn i dalu’r rhent, costau rhedeg yr eiddo a’r costau atgyweirio a ysgwyddir gan y tenant ac ati. (Fel arfer, bydd angen tystlythyrau ariannol i gadarnhau hyn.)
8. Pa mor addas yw’r tŷ i anghenion y tenant a’i deulu, h.y. ei faint, garej, gardd ac ati.
9. Yr angen i’r tenantiaid fod yn sympathetig tuag at nodau’r Ymddiriedolwyr o ran diogelu cymeriad yr eiddo.

Y drefn safonol yw y dylid rhoi dull dilyniannol ar waith fel a ganlyn:

• Lleol ac yn gallu siarad Cymraeg
• Cysylltiad lleol ac yn gallu siarad Cymraeg
• Yn gallu siarad Cymraeg ond heb gysylltiadau lleol
• Lleol ond ddim yn gallu siarad Cymraeg
• Cysylltiadau lleol ond ddim yn gallu siarad Cymraeg
• Unrhyw un arall nad yw’n perthyn i’r categorïau uchod ond a fyddai, ym marn yr Ymddiriedolwyr lleol, yn gwneud tenant da ac yn integreiddio’n llwyr i’r gymuned leol.

Mae ‘lleol’ yn golygu unigolyn sydd wedi byw’n ddi-dor yn ardal yr Ystad, neu o fewn 5 milltir i’w therfynau, ers pum mlynedd o leiaf.

Lawrlwythwch: Polisi Gosod Tai Ystad Brondanw

Rai blynyddoedd yn ôl, cydnabu’r Ymddiriedolwyr y diffyg cysywllt rhwng y rhai a oedd yn ddi-waith ac a gâi fudd-daliadau a’r rhai a oedd mewn gwaith ond a gâi gyflogau isel ac a oedd, o’r herwydd, yn anghymwys i gael cymorth gan yr Awdurdod Lleol. Roedd yr Ymddiriedolwyr o’r farn fod y garfan olaf dan anfantais, ac o’r herwydd aethant ati i sefydlu Cynllun Ad-daliad Rhent arloesol. Caiff y cynllun ei weinyddu gan Gyngor Gwynedd, yr Awdurdod Lleol, ar ran yr Ymddiriedolwyr ar y cyd ag asiantau’r Ymddiriedolwyr. Cafodd Cyngor Gwynedd ei gynnwys yn y cynllun er mwyn sicrhau didueddrwydd llwyr. Mae’r cynllun yn cynnig ad-daliad rhent o hyd at £20 yr wythnos i denantiaid cymwys.

Ar gyfer tenantiaethau ac ad-daliad rhent:
I wneud cais am denantiaeth ar gyfer un o dai Ystad Brondanw, neu i gael rhagor o wybodaeth am Gynllun Ad-daliad Rhent yr Ystad, cysylltwch â Frances Steer neu Richard Jones-Perrott yn Balfours.

Frances Steer: francessteer@balfours.co.uk

Richard Jones-Perrott: richardjones-perrott@balfours.co.uk

Ffôn: 01743 241181.